|
Mir steen doo uff der Mittlere Brugg
und dängge an vyyl Beeses zrugg
bim Käppelijoch, vor langer Zyt
hänn amme ganz e Huffe Lyt
drängelet, enander gschupft
zooge und der Vordey grupft
alli mechte vorne sy
doch d Hauptsach isch, me isch derby
wenn der Hängger afoot schaffe
duet die ganzi Meuti gaffe
z mitts drinne liggt die armi Frau
sy zittere, me sehts genau
Händ und Fiess sinn zämmebunde
am Rugge het sy tiefy Wunde
me bindet no an ihry Bay
e ganze Huffe schwääry Stay
der Hängger paggt se an de Gwänder
und stellt se kurz uffs Bruggegländer
d Meuti tobt, findets grandioos
denn losst der Hängger pletzli loos
sy fallt in Rhy, me seht se nimme
gfesslet ka au die nid schwimme
dasch nid erfunde und nid erschtungge
friehner sinn so vyyl verdungge
Häxe syges, hett me gsait
wo bringe ganz e Huffe Laid
knapp dryssig Fraue, so schtohts im Bricht
schtellt me z Basel so vor Gricht
sy haygen allem Aaschyyn aa
mit em Deyfel e Verhältnis gha
die Erschty - me waisses ganz genau
syyg e Basler Metzgersfrau
Gret Fröhlicherin, so schtoht gschriibe
die haigs als Häx in Basel driibe
s Gricht hett das eso erkennt
als Stroof hett me se denn verbrennt
au d Barbel Schinbeinin, kasch lääse
das syyg au e soone Wääse
wo mit em Deyfel amm z Nacht
bim Riechtor e Nümmerli macht
au s Margreth Vögtli schtoht vor Gricht
wird gfolteret, schtoht immene Bricht
vier Wuche lang, sy git nyt zue
me losst se aber denn in Rueh
und sperrt se in e Armehuus
s lääbelang - es isch e Gruus
im Mittelalter isch das gsy
me richtet Lyt als Häxe hi
e paar Lyt uss em Groose Root
- d Regierig sait, dass das nid goot -
e Freyspruch fir die Lyt goht nid
d Datenlaag die längi nid
Als Ersatz duet me bim Rhyy
bim Käppelijoch, grad vis-à-vyy
fir all die Opfer - zem Gedängge
e Daafele ans Gländer hängge
laufsch du näggschtens iber d Brugg
halt kurz aa - und dängg kurz zrugg
was doo bassiert isch - vor vyyle Joor
isch schampar druurig und erscht no wohr
|
