Sisch wider Zyt

 
S isch wider Zyt go d Larve kaufe,
Sich d Waggishose glette lo
Und z Oobe spoot dur d Gässli laufe,
De Drummen und de Pfyffe no.
 
S isch wider Zyt go Räppli schmaisse,
Zwai Noomidäg an Trottoir stoh
Und bi de Suppe, bi dr haisse,
Dr Morgestraich versure lo. 
 
S isch wider Zyt go d Zunge schlyffe
Bim Schneeden un am Piccolo
Und sich sy aige Värsli pfyffe
Uff alles, wo nit comme-il-faut.
 
S isch wider Zyt fir Zirihegel,
im Äxtrazug uff Basel z ko,
Und sich vo unsere Drummelschlegel
Dr Takt, woihne fählt, lo z schlo.
 
S isch wider Zyt firs Fasnachtsgwimmel,
Fir Farbe, Muusig, Melody
Und fir der Gump in sibte Himmel...
S isch wider Zyt, e Basler z sy.
 
Blasius