30 Joor Wiehlmys Alti Garde   

Jubiläumsbummel 17.Mai - 19.Mai 2019 uff Köln   
     
 

Frydig 17. Mai

Uff die siibeni am Morge hänn zwölf guetglunti Altgardischte sich in dr Schalterhalle vom Badische Bahnhof droffe. Im Zug Richtig Köln hett me
sich sälbscht verpflägt, e baar mit eme Sandwich und anderi mit eme ussgwagsene Brunch. Zwüsche Karlsruhe und Mannheim und uff
drängge vo einige sehr durschtige Mysli hett d’Bea und dr Dieter ys allne
uff die nüni e Sektapero spendiert.


11.05h Aakunft im Kölner Hauptbahnhof, denn isches z’Fuess ca. 10 Minute,
ins Hotel Buchholz Downtown gange. Alli hänn dert ihr Gepägg könne
verstaue. E Halbstund spöter isch Besammlig gsi und mir hänn ys am Rhyufer Richtig Altstadt gmacht. Im Restaurant Rheinzeit isch es ändlig sowyt gsi,
unser erschts Kölsch hänn mir könne gniesse. Aifach Herrlig.

Im Restaurant Brauhaus Früh am Dom isch für ys s’Zmitdaagässe reserviert worde. Härdöpfelsalat mit Frikadelle und Kölsch nadyrlig. Und plötzlich
daucht unseri Pfyffere Marianne Gloor mit Aahang, wo au zer glyche Zyt in
Köln verwyllt mit grossem Hallo uff, es isch nit s’letschtmool wo mir s’Marianne gseh wärde.

16.15h isch wieder dr näggschti Dräffpunggt gsi und zwar vor unserem Hotel,
do fahre doch tatsächlig drey Taxi vor und es hett g’haisse yyschtiege.
D’Fahrt hett ys zum Kölner Karnevalsmuseum gfiehrt, wo mir vom Joachim
e ai Stündigi Fiehrig wo är mit vyl Härzbluet, uns sy Karneval nöcher brocht hett. S’isch sehr interessant gsi. Nach dr Fiehrig im Karnevalsmuseum sinn mir alli wieder in d’Taxi’s gschtiege und in d’Kölner Altstadt chauffiert worde. Im Restaurant Gilden im Zims isch für ys reserviert worde und mir hänn uff unsere Disch e Spieskarte aadroffe wo d’Form vo unsere Fasnachtszeedel ka hett,
mit unserem Namme druff und em Menu. Grossartig. Do die Brauhüüser so
gross sind und unglaublig schöni Käller hänn, hänn mir ys nach däm guete Ässe entschiede no in däm tolle Käller e Abschiedskölsch go nä. Bim Wäg uff em Haimwäg hett‘s e huffe glaineri Baizli. Immene ganz urchige mit em Namme Löwenbräu hett’s dr erschti vo e baar Schlummerkölsch gä. 

 
     
 

Samschdig 18. Mai

Am halber nüni sinn alli Altgardischte im härzige Morgeässestübli vo unserem Hotel g’sässe, sogar unserem Langschlööfer Dieter hett’s glänggt. Nach eme rychhaltige z’Morge, hänn mir bis am ains z’Mitdaag Zyt fir ys zer freye
Verfiegig ka, d’Mehrhait, also dr wyybligi Dail isch go schoppe und d’Herre
hänn sich Kulturellem zuegwändet.

Dr Dräffpunggt am Ains isch am Dom gsi. Und dört sinn mir uff e Maximilian
droffe, dä mit uns e Brauerei-Tour z’Fuess gmacht hett. E herrlige junge Maa,
dä mit sim Charme und Witz alli für sich gwunne hett. Die Tour isch laider numme zwei Stund gange und mir hänn drei tolli Brauhüüser könne bsueche und hänn doch no sehr vyl vo dr Brauhuuskultur vermittlet griegt. Mir miend jo do an däre Stell nit erwähne, dass mir bi däre Tour nit uff em Droggene g’hoggt sind, oder?
Im letschte Brauhuus hänn e huffe no e glains Hüngerli verspürt und denn dört grad no e Mitdaagässe zue sich gno.

Uff die siibeni z’Oobe isch denn wieder Zyt zem z’Nachtässe gsi, reserviert
worde isch in dr Wyystubbe Brungs. Mit Verspötig hänn denn schlussändlig
au die Letschte an Disch gfunde. Au do isch s’Ässe e Hit gsi. Und wie scho
am Frydigoobe hett’s wieder e baar Schlummerdringgs gä bevor’s Richtig
Hotel gange isch.

 
     
  Sundig 19. Mai

Nach em z’Morge hänn mir Zimmer miesse ruume und s’Gepägg in Gepäggruum stelle. Uff die halberzähni isch es den z’Fuess zem Dom gange und dört sinn mir in e Bimmelbähnli yygschtiege. Mir hänn d’Schoggitour gmacht, e sehr holprigi Aaglagehait isch das gsi, mehrmools sinn Düürli vo däm Bähnli uffgschprung,
aber es isch witzig gsi. Bim Schokoladenmuseum sinn mir ussgschtiege und
hänn uff aigeni Fuscht das Museum könne erkunde. Interessant isch gsi, das die grad vor Ort d’Schoggi wo si im Shop verkaufe au dört produziere dien und me
ka zueluege und no besser dra isch dass es e Schwyzer Schoggi isch!! Gnau gsait Lindt, dr Aigetümer hett 2004 sy Aadail an Lindt und Sprüngli verkauft. Aagschlosse an däm Museum hett’s e Kaffi, gnau gsait e Grand Cafe mit ere wunderbare Rhyterrasse und bi däm herrlige Wätter isch denn Schlussändlig
dert dr Dräffpunggt gsi wo me sich mit gluschtigem guete Kueche und Kaffi
droffe hett. D’Aabfahrt wär uff die ains am Mitdaag plaant gsi, aber do’s e grosse
Demo-Umzug ka hett, hett d’Bimmelbahn nümme könne zrugg fahre, do
d’Tour - Strosse in dr Umgäbig gsperrt worde sind. E Baar hänn e Taxi gno,
und die andere hänn d’Streggi under d’Fiess gno, 25 Minute spöter sind au
d’Fuessgänger im Hotel gsi.
 
  Noch dämm alli ihr Gepägg ka hänn isch es wieder z’Fuess uff e Bahnhof gange. Uff die drey isch denn dr Zug wieder zrugg uff Basel gfahre, e baar hänn Sandwich g’ässe und ander ihre Brunch fertig gässe und Bea und dr Dieter hänn wieder e Sekt spendiert. An däre Stell Härzlige Dangg und au Härzlige Dangg an alli Mys die e Rundi zaahlt hänn.  
     
  In beschter Luune hänn mir ys am Badische Bahnhof vo enander verabschiedet
Es sinn drey grossartigi Dääg gsi, mir hänn vyl zämme glacht.
Unser aller Dangg g’hört em OK Lisa, Sonja, Rita und Bea ihr hänn e organisatorischi Beschtnoote verdient, es isch aifach dr Hammer gsi.
 
     
  MERCY VYLMOOL  
     
  Zwei wo dä herrligi Bummel hänn dörfe miterläbe